SHASH UNUIPANU MASHINAIKAN, KA AISHPANIT ATUSSEUN NETE MASHINAIKANITSHUAPIT KA NATU-TSHISSENITAKANIT ESHPANIT ASSI (BAPE)

Upishtikueiau, ume 16 shetan-pishim^u 2008 – Miam ka ishi-natuenitak utshimau Line Beauchamp, ka atusseshtak meshituepanitakanit iapatannit tshekuannu anite tekuannit assit mak ka tshitapatak eshinakuannit assinu mak assia ka tshishpeuatakaniti, ne mashinaikanitshuap ka natu-tshissenitakanit eshpanit assi (BAPE) unuipanitau anutshish umashinaikan ka natu-tshissenitak mak ka natakanit auen. Natu-tshissenitakanipani neni assia mitshetuait ka aishinakuaki mate ka ishpanutaukat nete shakaikanit Belmont mak Magpie, ka ishpatinashit nete shakaikanit ka ishinikatet Sauterelles, ka apishashiti utshua nete shakaikanit Guernesé mak nete utshussa Brador nete assia tekuaki tshiuetin mamit. Ushkau-pishimua neme pipun 2006, peikunnu ashu neu e tshishtuakanit, tshitshipanipan netu-tshissenitakanit. Tshimanakanipanat auenitshenat tshetshi tutahk atusseunnu tshetshi tshitapatahk eshpannit, ne takuaitshepan utshimau Pierre Béland.

Katshi tshitapatahk nenu atusseunnu ka tutakannit, anitshenat ka taht nete mamuitunit itenitamuat, tshipa minuanu ne Upishtikueiau-tshishe-utshimau uipat katipanashtat assia ka tshishpeuatakaniti, neni e nishiki assia, ka ishpatinashit shakaikanit Sauterelles mak ka ishpanutaukat shakaikanit Belmont mak Magpie. Muk^u ma uin tshatapatakanitaui neni assia, miam mate ka ishpanutaukati tekuaki shakaikanit Belmont mak Magpie, anitshenat ka natu-tshissenitahk ka taht mamuitunit itenitamuat : utshimau ka atusseshtak meshituepanitakanit iapatannit tshekuannu anite tekuannit assit mak ka tshitapatak eshinakuannit assinu mak assia ka tshishpeuatakaniti, tshipa ui kau ueueshi-tipaim^u nenu shakaikannu Magpie, natamit tshetshi eshk^u ishpitenitakanit ne ka minunakuak assi mak eshi-takuak tshekuan assit. Anitshenat ka taht mamuitunit natuenitamuat tshetshi eka nutshitakanit shipu Magpie nete enauat tshek ma minuat kutak ui tutakaniti ushkutim nanamissiu-ishkuteu atusseshtakaniti. Tshetshi tutakanit ne assi ka tshishpeuatakanit tshipa ui tshipaikanu shipu tshetshi eka pikunakanit eshinakuak. Tshetshi eka shuk^u mishkutshipanit eshi-minunakuak assi mak ashit tshetshi eshku nishtuapatakanit nete ait assit. Eku mashten, tshetshi tshimatakaniti, tshek ma ishinakuaki, neni utatshishiapiu-mishtikua nanimissiu-ishkuteu tshe takuak, natuenitakanu tshetshi ueueshi-tshitapatakanit eshpishat assi ka ui tshishpeuatakanit. Tshipa ui pitama tutakanu tshi tshishtapatakaniti atusseun ka natu-tshissenitakanit mak ka tshitapatakanit tan tshe ishi-katshitaikanit assi, nete ua tutakanit nanimissiu-ishkuteu unaman-shipit. Tshika ashuapatakanu tshetshi tshishtakaniti ne ka ui tutakanit assi ka tshishpeuatakanit mak ashit ne eka shuk^u ua pikunikanit assi mak eka ua mishituepanitakanit kie tan tshe ishi-tshishikashutshepanitakanit tshekuan.

Ka natshi-natutuakaniht anitshenat ka patshitinahk utaimunuau, anitshenat ka natu-tshissenitahk^u nenua ait ka ishinakuaniti assia nete utshussa Brador, ka apishashiti utshua nete shakaikanit Guernesé apu ut tapuetahk anitshenat pessish epiht anite. Ne uet eka tapuetakaniti neni atusseuna, tanite ushkat ka tutakaniti assia ka tshishpeuatakaniti ute Uepishtikueiau-assit, apu ut kukuetshimakaniht auenitshenat. Anitshenat ka natu-tshissenitahk nenua assia, natuenitamuat eshk^u eka natshishk ishinakuaniti nenua assia, tshetshi tshiuenamuakaniti, nish^u tshekuana, nenua auennua ka ishi-natuenitaminiti. Ushkat mate, ne utshimau ka atusseshtak meshituepanitakanit iapatannit tshekuannu anite tekuak assit mak ka tshitapatak eshinakuannit assinu mak assia ka tshishpeuatakanititshipa ui tshitapatam^u pitama shipunu Bujeault tanite tshimatenua anite kutikuniutshuapa nete tekuak shakaikanit Guernesé. Ek^u kutak minuat, ne utshimau ka tshitapatak assinu eshinakuanit mak aueshisha eshi-taniti anite, ka uitshiaushit umenua assia ua tshishpeuatakaniti, tshika ui tshitapatam^u kie uitam^u tshekuannu uet tshitaimatshenanut tshetshi nutshitakanit, ne tshekuan eshi-takuak anite assit. Anite etaht netu-tshissenitakanit, itenitamuat anu tshipa minuanu pitukaiakaniht auenitshenat aimun uetinakaniti tshetshi tapuetatishuht, neni assia e tshitapatakaniti.

Anitshenat ka natu-tshissenitahk tshekuannu uapameuat innua etaniti nete netu-tshissenitakanit, uetuteniti anite ut Ekuanitshit mak Pakut-shipit. Ekute uiapamakaniht innuat eshpitenitahk kie shiatshitaht utassiuau epishtahk. Anitshenat ka natu-tshissenitahk tshekuannu uapatamuat nenu, peikuan iapit nenu eka natshishkakutaui anite eshinniuht innu-aitunit anite tshe aitatusseht, innu-assia Ekuanitshit mak Pakut-shipit uitamupanat eka tiapuetahk nenu eshi-utinakanit kie katipanakanit assinu, utassiuau nenu shash ka natashtaht utipenitamunuaua anite tekuaniti assit mak shash nenua ka natapishtuaht nenu ut, Upishtikuieau-tshishe-utshimaua mak Utaua-tshishe-utshimaua.

Ek^u mashten, ne mashinaikanitshuap ka natu-tshissenitak tshekuannu kau uitam^u nenu meshta-apatannit tshetshi minu-katipanakaniti assia tshetshi tshishpeuatakaniti. Tshetshi kanapua eshk^u takuak assi eshinakuak kie eshi-takuak tshekuan anite nutim eshpishat Upishtikueiau-assi. Ne ua tutakanit, eukuan ne ua mitshiminakanit assi nuash 8 % eshpishat ne nutim Upishtikueiau-assi. Shash kie ueshamapinanu ka ui tutakanit ne tshekuan, tshika ishinakuan tshetshi nutim auen uitshiaushit kassinu anite mashinaikanitshuapa eshi-takuaki. Eukuannu anitshenat uet pakushenimaht tshishe-utshimaua, tshetshi eshk^u nashataminiti nenu ua tshishpeuatakaniti assia. Tshipa ui ashitshikakanu kie tshipa ui anakanuat auenitshenat anite mak ashit tshipa ui katshenipinanu e ashtakanit shuniau, tan tshe ishi-atusseshtakaniti assia ua tshishpeuatakaniti. Tanite apu shuk^u shashish ne tatusseshtakaniti ua tutakaniti assia ait ka ishinakuaki, ua tshishpeuatakaniti. Anitshenat ka natu-tshissenitahk tshekuannu itenitamuat ka-minuanua innuat tshetshi uipat uitamuakaniht eshpannit, tan ua itatussenanut mak tshe ishi-tshishikashunanuti neni assia.

TAN TSHE ISHPISH TAKUAK NE MASHINAIKAN

Ne mashinaikan, anitshenat ka natu-tshissenitahk mak ka nataht auennua, neni assia ka natu-tshissenitakaniti mitshetuait ka aishinakuaki mate ka ishpanutaukat nete shakaikanit Belmont mak Magpie, ka ishpatinashit nete shakaikanit ka ishinikatet Sauterelles, ka apishashiti utshua nete shakaikanit Guernesé mak nete utshussa Brador nete assia tekuaki tshiuetin mamit, shash unuipanu. Tshipa tshi tshitapatenau nete umashinaikanitshuapit ka natu-tshissenitakanit eshpanit assi (BAPE), nete ka takuaki mashinaikana itetshe ka tutakanit ne atusseun mak ashit nete atusseu-katshitapatakanit ne mashinaikanitshuap ka natu-tshissenitakanit eshpanit assi (BAPE), etashtet www.bape.gouv.qc.ca. Tshipa tshi ashit natuenitenau nete mashinaikanitshuapit ka natu-tshissenitakanit eshpanit assi (BAPE), e mashinaimuek^u nete utatusseu-katshitapatakanimit nenu etashtenit : communication@bape.gouv.qc.ca  kie ma tshipa tshi aiminau nete etashtet : 418 643-7447 kie ma anite eka ka tshishikashunanut kaimitunanut ka itashtet : 1 800 463-4732.

Tshissitutetau neme ushkat ka tshitshipananut netu-tshissenitakanit, anitshenat ka natu-tshissenitahk itutepanit neuau nete utenat : Patamit, Naishipinut mak nete akamit Pakut-shipit akaneshauat etaht mak nete innu-assit Pakut-shipit. Minuat ekue tutakanit, nishtuau natutuakanipanat auenitshenat, ekute minakanipanat ka natu-tshissenitahk tshekuannu, nishunnu ashu patetat mashinaikana mak kutuasht itashinipani niatshi-uauitaminiti etenitaminiti auennua, ashit anitshenat ka mamuituht auenitshenat, mashinaikanitshuapa mak utenauat ka takaukuht nenu atusseunnu etutakannit.

– 30 –

Louise Bourdages
Ka atusseshtak aimunnu pemushtakannit
418 643-7447 kie ma 1 800 463-4732, poste 232
louise.bourdages@bape.gouv.qc.ca